BP SOFAZ-a $182 milyon bonus ödəyib

Hesabata əsasən, "Azəri-Çıraq-Günəşli” (AÇG) yataqlar blokunun işlənməsi layihəsinin səhmdarları 2022-ci ildə 449,99 milyon dollar (764,98 milyon manat) bonus ödəyiblər.

Eyni zamanda BP 182,25 milyon dollar (309,82 milyon manat), MOL Azerbaijan Ltd. - 57,41 milyon dollar (97,6 milyon manat), Inpex Southwest Caspian Sea Ltd. - 55,84 milyon dollar (94,93 milyon manat), Equinor - 43,61 milyon dollar (74,14 milyon manat), Exxon Azerbaijan Limited - 40,75 milyon dollar (69,27 milyon manat), TPAO - 34,38 milyon dollar (58,44 milyon manat), Itochu Oil Exploration (Azerbaijan) Inc. - 21,89 milyon dollar (37,22 milyon manat), ONGC Videsh Limited - 13,86 milyon dollar (23,56 milyon) bonus ödəyib.

2022-ci ildə Şahdəniz layihəsinin səhmdarlarından SOFAZ-a bonus ayırmaları 0,17 milyon dollar (0,31 milyon manat) təşkil edib.

Neftçala, Xıllı, Durovdağ-Babazan və Muğan monoklinalının cənub-qərb qanadının qurudakı yataqlarının işlənməsi ilə məşğul olan Neftçala Operating Company Ltd əməliyyat şirkəti fonda  bonus olaraq 2 milyon ABŞ dolları (3,4 milyon manat) ödəyib..

1999-cu ilin dekabrında yaradılmış Azərbaycan Neft Fondunda neft kontraktlarının icrasından, daxil olan vəsaitlər akkumilyasiya edilir. 

"Azəri”, "Çıraq” və "Günəşli” yatağının dərinsulu yatağının işlənməsi üzrə müqavilə 1994-cü il sentyabrın 20-də imzalanıb və həmin il dekabrın 12-də qüvvəyə minib.

Bu müqavilənin müddəti 2024-cü ildə başa çatır. Lakin 2017-ci il sentyabrın 14-də Bakıda AÇG blokunun işlənməsi üzrə 2050-ci ilə qədər hesablanmış yeni müqavilə imzalanıb.

Neftçala Operating Company Ltd Virgin Adalarında qeydiyyatdan keçmiş Neftchala Investment Limited (NIL) tərəfindən təsis edilib.

2009-cü il fevralın 3-də Bakıda SOCAR ilə Neftçala İnvestment Limited (NIL) arasında Neftçala, Xıllı, Durovdağ-Babazan və Muğan monoklinalının cənub-qərb qanadının qurudakı yataqlarından hasilatın kəşfiyyatı, bərpası, işlənməsi və pay bölgüsünə dair müqavilə imzalanıb.  Bu müqavilədə SOCAR 20%, NIL - 80% (layihə operatoru) paya sahibdir. Müqavilə daha 5 il müddətinə uzadılmaq imkanı ilə 25 il müddətinə imzalanıb.