Moskvada Azərbaycan-Rusiya Hökumətlərarası Komissiyasının 21-ci iclası keçirilib

 

Nazirlər Kabinetindən  verilən xəbərə görə, iclasda Azərbaycan və Rusiya tərəfdən komissiyanın sədrləri – Baş nazirin müavini Şahin Mustafayev və Rusiya Baş nazirinin müavini Aleksey Overçuk, o cümlədən müvafiq dövlət qurumlarının rəhbərləri və səlahiyyətli şəxsləri iştirak ediblər.

Tərəflər Azərbaycan-Rusiya dostluq əlaqələrinin inkişafından məmnunluqlarını ifadə ediblər. Qeyd edilib ki, Azərbaycan və Rusiya prezidentləri arasında aktiv siyasi dialoq və şəxsi əlaqələr ikitərəfli əməkdaşlığın bütün spektrlərinin yüksək dinamikasının təmin edir.

 

Nəzərə çatdırılıb ki, Azərbaycan-Rusiya ticari-iqtisadi əlaqələri xüsusən müsbət dinamikaya malikdir. Ölkələr arasında ticarət dövriyyəsi 2022-ci ildə 24 faiz artıb və 3,7 milyard dolları ötüb.

 

Qarşılıqlı investisiyalar da artıb. Azərbaycan-Rusiya və Rusiya-Azərbaycan İşgüzar Şuralarının işgüzar dairələr arasında birbaşa əlaqələrin qurulmasına verdiyi töhfə müsbət qiymətləndirilib. Tərəflər həmçinin sənaye kooperasiyalarının uğurlu inkişafını qeyd ediblər. Bildirilib ki, aqrar-sənaye kompleksi sahəsində əməkdaşlıq yaxşı templərlə inkişaf edir.

Tərəflərin nəqliyyat-logistika əlaqələrinin inkişafına xüsusi əhəmiyyət verdiyi vurğulanıb. Yükdaşımalar sahəsində müsbət dinamika var, 2022-ci ildə yükdaşımalar 36 faiz artıb. Eyni zamanda Şimal-Cənub Beynəlxalq Nəqliyyat Dəhlizi layihəsinin tərəflər prioritet olaraq qiymətləndiriblər.

Tərəflər qarşılıqlı maraq doğuran sahələrdə ikitərəfli əlaqələrin inkişafı perspektivlərini müzakirə edib, qarşılıqlı faydalı əməkdaşlıq sahəsində konstruktiv dialoqun davam etdiriləcəyinə maraqlarını ifadə ediblər.