25-dən çox partiya bağlandı,qanun dəyişməlidirmi? - Partiya sədrlərindən açıqlama

"Aydınlar Partiyası öz nizamnaməsinə uyğun olaraq fəaliyyətini dayandırıb. Partiya üzvləri yeni partiya yaratmaqda və ya qüvvədə olan mövcud partiyalardan birinin tərkibinə daxil olmaqda tam sərbəstdirlər. Çünkü nə qanun, nə də heç bir partiyanın nizamnaməsi əvvəllər başqa partiyanın üzvü olmuş şəxsin yeni partiya yaratmasını qadağan etmir. Şəxsən mənim özümə gəldikdə isə mənim həm nə yeni partiya yaratmaq, nə də mövcud partiyalardan birinə daxil olmaq və ya Aydınlar Partiyasının fəaliyyətini yenidən bərpa etmək fikrim yoxdur. Əgər bərpa etmək fikrim olsaydı, Aydınlar Partiyasının fəaliyyətini dayandırmaq barədə düşünməzdik. Təbii ki, yeni qanun qəbul olunanda bir çox sərtləşdirici və məhdudlaşdırıcı müddəalar qanuna daxil edilib”, - Qulamhüseyn Əlibəyli deyib.


"Partiyamızın 29 il fəaliyyətindən sonra ləğv olunmasının səbəbi əhalinin çoxsaylı partiyalara o cümlədən bizim partiyaya ciddi dəstək verməməsi ilə əlaqədardır. Partiya sədrləri bu gün daha çox siyasi ekspert kimi fəaliyyət göstərirlər. Ortaya ciddi bir proqram qoyan partiya yoxdur və cəmiyyətin müzakirəsinə sanballı konsepsiya təqdim olunmur.  Əgər xalq dəstəkləmirsə, maliyyə dəstəyi yoxdursa, bu partiyanı yalnız görüntü xatirinə saxlamaq deməkdir. Real iş görmək mümkün deyil. Bizim partiyamız dəfələrlə prezident və parlament seçkilərində iştirak etsə də proporsional qaydada bütün seçkilərdə iştirak edən bir neçə az saylı partiyalardan biri bizim partiyamız olub. Ancaq dəstək yox idi. Odur ki,  belə bir qərar qəbul elədik. Mən hesab edirəm ki, bundan artıq partiya bağlanmalıdır”, -  Abutalıb Səmədov vurğulayıb. 

O həmçinin söyləyib ki, Azərbaycanda real fəaliyyət göstərmək imkanı olan Yeni Azərbaycan Partiyasıdır. 

"Qanun qəbul olunarkən biz ilk növbədə siyasi partiyaların birləşməsini təklif elədik. Daha ciddi bir qüvvə ortaya qoymağı  lazım bildik, ancaq partiya sədrlərinin çoxunun mövqəyi bundan ibarət oldu ku, kimsə birləşmək istəyirsə gəlsin bizim partiyaya birləşsin. Sonradan da həmin o hay-küylü bəyanatı verənlər son bəyanatlarını verdilər ki, partiyamız ləğv olundu. Ancaq bu ləğv olunma prosesi güman edirəm ki, bundan sonra da davam edəcək. Çünkü hər bir partiya sədri lider olaraq qalmaq istəyir. Kimsə daha ciddi partiyada ikinci və ya üçüncü olmağı ağlına sığıştırmır. Bu səbəbdən yeni qanun tələblərini ödəmək imkanı olmayan partiyalar ləğv olunmaq məcburiyyətindədirlər. Çünkü 5 min nəfərin siyahısını tələb olunan qaydada hazırlayıb vermək və hər il bunu dəyişdirmək üçün partiyanın maliyyə imkanları partiyanın aparatır və partiyanın yerli təşkilatları olmalıdır ki, bu da çox az saylı partiyalarda mövcuddur”, - Səmədov bildirib.

"Siyasi partiyaların inzibati yollarla bağlanması normal deyil. Siyasi partiyaları onların qurultayları elan eləyə və ya bağlaya bilər. Amma hansısa partiyanın qarşısında 5 min nəfərlik məhdudiyyət qoyulursa və o bunu təmin edə bilmirsə, bu artıq siyasi pluralizmə qarşı bir prosesdir. Baxmayaraq ki, bu ləğv olunmuş partiyaların bir çoxu elə administrativ qaydada yaradılıb.  Bütün hallarda siyasi partiyaların fəaliyyətini dayandırması yaxşı hal deyil. Bu ölkənin siyasi həyatına yaxşı heç nə vəd eləmir. Biz bir neçə gün əvvəl, 5 mindən çox üzvün qeydiyyat  ilə bağlı məlumatları Ədliyyə Nazirliyindən qeydiyyatdan keçirmişik. Bizim üzvlərin sayı ilə bir problemimiz yoxdur. Sadəcə olaraq biz bununla bağlı məlumat verərkən də bildirdik ki, bu qanunun həm fundamental insan haqlarına, həm birləşmə azadlığına, ifadə azadlığına və Venesiya Komissiyasına ziddir. Xalq Cəbhəsi Partiyası yeni dövrdə özünün fəaliyyətini hüquq müstəvisindən çıxarmamaq üçün bu istiqamətdə addım atdı. Azərbaycan Xalq Cəbhəsi Azərbaycan tarixində siyasi hərəkatdan yaranan ilk partiyadır. Xalq Cəbhəsi Azərbaycanın müstəqilliyinin bərpa olunmasından sonraki tarixin ən əsas siyasi təşkilatıdır. Biz bütün gücümüzlə fəaliyyətimizi davam etdirmək üçün mübarizə aparacağıq. Ümumiyyətlə, bu qanun Azərbaycanı dünyada rüsvay edən bir qanundur. Azərbaycanın üzvü olduğu Avropa Şurasının Venessiya Komissiyasının siyasi partiyalara dair kriteriyalarına təmamilə zidd bir qanundur. Yaxşı olar ki, bu tənqidləri birbaşa aradan qaldırmaq üçün ya əvvəlki qanun çərçivəsində ya da daha uyğun bir qanun qəbul olunsun”, - Seymur Həzi bildirib. 

Rabia Hale Seferoğlu

www.anews.az