Makron hökumətdə dəyişiklik edəcək

Fransa prezidenti Emmanuel Makron hökumətdə dəyişiklik edəcək, BFMTV Yelisey sarayındakı mənbəyə istinadən xəbər verib.

Kanal qeyd edir ki, baş nazir Elizabet Born vəzifəsini qoruyub saxlayacaq.

Fransa lideri Nazirlər Kabinetində dəyişiklikləri bu həftənin sonuna qədər açıqlayacaq.

Bundan əvvəl Makron bildirib ki, Ukrayna lideri Vladimir Zelenskinin Qərbdən dəstək tələb etmək hüququ var, o cümlədən ölkənin NATO-ya qəbulu məsələsində. O, bunu NATO-nun Vilnüs sammitinin yekunlarına dair mətbuat konfransında deyib.

Fransa rəhbərinin sözlərinə görə, qısa və uzunmüddətli perspektivdə Kiyevə dəstək vermək "beynəlxalq hüquq naminə” Qərb ölkələrinin üzərinə düşür.

Avropa Birliyinin Ukraynaya 14 milyard avroya yaxın hərbi yardım etdiyinə diqqət çəkən Makron Fransanın özünün də dəfələrlə yardım etdiyini bildirib. O, həmçinin Ukraynanın NATO-ya üzv olmaq istəyinə hörmət etməyə çağırıb. Onun sözlərinə görə, sammit çərçivəsində "ən birbaşa yolun açılması” üçün tədbirlər görülüb.


www.anews.az