Ətin qiyməti bahalaşıb - SƏBƏB

Mal ətinin qiyməti  son bir həftədə 1 manat bahalaşaraq bir kiloqram üçün 15-16 manat arasında təklif olunur. 

Liberal İqtisadçılar Birliyinin sədri, iqtisadçı-ekspert Akif Nəsirli ətin qiymətinin indi  bahalaşmasını qeyri di hal hesab edir.  

" Azərbaycan əhalisinin böyük əksəriyyəti şiədir və  məhərrəm ayında şənliklər təşkil edilmədiyindən ətə tələbat azaldır. Buna baxmayaraq  ət bahalaşırsa bu ölkədə ət istehsalının aşağı düşdüyünü göstərir. Həm də ölkəyə ət idxalı çoxalıb. Amma idxal edilən ət Azərbaycanda bazarda satılan əti əvəz edə bilmir. İdxal əti əslində hökümətin çoxsaylı şəxsi həyəti olan qurumlarında istifadə olunur. Amma bazarlarda, qəssabxanalarda heç vaxt idxal əti satılmır. İndiki şəraitdə ətə tələbatın az olduğu dövrdə ətin qiyməti qalxırsa onda demək olar ki, önümüzdəki aylarda tələbat artdığında ətin qiyməti yenə qalxacaq. Noyabr, dekabr, yanvar aylarında ətin qiymətinin daha yüksək faizlərlə artacağı gözlənilir”, - Akif Nəsirli söyləyib. 

Mövzu ilə bağlı iqtisadçı-ekspert Xalid Kərimli qiymətlərin artımını ət istehsalçılarının  xərclərinin artması ilə izah deyib.

"Mal əti bazarında qiymətləri dövlət tənzimləmir, bazar tənzimləyir. Ət bazarında tarif şurası qiymət verir. Bu monopoliya var ki, buna İqtisadiyyat Nazirliyi baxır. Ət bazarında dəyişikliklər formalaşır. Bir neçə ət bazarı var. Bura quş əti məhsulları, qoyun əti məhsulları, mal əti və balıq əti məhsulları daxildir. Məncə ətə olan tələbatımızın 85%-ini yerli istehsal təmin edir. Qoyun əti üçün isə bu rəqəm 97%-dir. Çünki, qoyun əti istehsalı ətrafımızda ən yaxçı bizdə inkişaf edib. Hardasa 80% quşçuluq məhsulları istehsalı ilə özümüzü təmin edirik və 90% mal əti ilə öz-özümüzü təmin edirik. Bunların hər biri, öz istehsalımız olsa da, hər birisi üzrə idxalda yem komponentləri üzrə asılıyıq. Ümumiyyətlə, ət istehsalında da maya dəyərlərinin xərclərinin əhəmiyyətli hissəsinin 70%-ə qədəri yem komponentləri üzrə formalaşır. Yəni ətin istehsal olunmasının maya dəyərinin 70%-i yemdir. Bu yem komponentlərində də xaricdən asılıyıq. Həm soya məhsulları, həm dərman məhsulları, həm bu sahədə istifadə olunan buğda və arpanın dəyəri qiymətlərə təsir edir. Bu  kontrolumuzda deyil. Bu baxımdan ət istehsalında son dönəmlər xərc artıb. Təbii ki, hər ət istehsalı üzrə xərclərin qiymətlərə təsiri olur. Tutaq ki, quşçuluqda 40 günə toyuq yetiştirirsənsə, mal heyvanın saxlanılması illər tutur. Ona görə də, xərclərin artımı bu fermerlərə və təsərrüfatlara da tədricən təsir edir”, - Xalid Kərimli vurğulayıb. 

Onun fikirlərinə görə,Azərbaycanın ucuz bazarları olan Ukrayna və Rusya indiki dövrdə əlçatmaz olduğuna görə yerli təsərrüfatların qiymətləri qaldırmasına yol açır. 



www.anews.az