“Azəristiliktəchizat”ın yığılmış zərəri açıqlanıb

Öyən il "Azəristiliktəchizat” ASC-nin yığılmış zərəri 108,4 milyon manata çatıb. Bu da ötən ilin eyni dövrü ilı nisbətdə 8,3% və ya 8,3 milyon manat çoxdur.  Bu barədə dövlət şirkətinin konsolidasiya edilmiş maliyyə hesabatında bildirilib.

"Azəristiliktəchizat" mənfəət və zərər hesabatını dərc etməsə də, yığılmış zərərin artım həcmi onu deməyə əsas verir ki, dövlət şirkəti ötən ili eyni həcmdə, yəni 8,3 milyon manat xalis zərərlə başa vurub. Bu isə şirkətin cəmi kapitalını 91,9 milyon manatdan 83,9 milyon manata qədər azaldıb.

2021-ci illə müqayisədə 2022-ci ildə "Azəristiliktəchizat”ın cəmi aktivləri isə 2% artaraq 151,9 milyon manata yüksəlib. 2021-ci ilin sonunda bu rəqəm 148,8 milyon manata bərabər olub.

Hesabat dövründə, ASC-nin debitor borcları isə 20,4% və ya 1,75 milyon manat artaraq 10,6 milyon manata yüksəlib.

2022-ci ildə "Azəristiliktəchizat” QSC istilik enerjisinin satışından 13 milyon 252,5 min manat gəlir əldə edib ki, bu da 2021-ci illə müqayisədə 0,5% azdır. 
 
2022-ci ilin sonuna "Azəristiliktəchizat” ASC-nin balansında fəaliyyət göstərən qazanxanaların sayı 1202 olub (2021-ci ilin sonuna olan göstəricidən 0,4% çoxdur). Qazanxanaların ümumi gücü 2729,1 Qkal/saat təşkil edir. Eyni zamanda, təbii qazla işləyən qazanxanaların sayı 1142, maye qazla işləyən qazanxanaların sayı 60-dır.

"Azəristiliktəchizat” ASC 2004-cü ildə yaradılıb və istilik təchizatı sahəsində dövlət inhisarçısıdır.