Avqustda sosial müavinət və təqaüd alanların sayı 826 min nəfərdən çox olub

2023-cü ilin avqustunda ölkə üzrə aylıq sosial müavinət və təqaüd alanların sayı 826 min nəfərdən çox olub. Bu barədə Dövlət Sosial Müdafiə Fondu məlumat yayıb.

Bildirilir ki, onların 436 min nəfərdən çoxunu aylıq sosial müavinət, 390 min nəfərdən çoxunu isə təqaüd alanlar təşkil edib.

Bu ilin 8 ayında Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondu tərəfindən 464 min nəfərə sosial müavinət, 375 min nəfərə Prezidentin aylıq təqaüdü ödənilib.

Əmək və Əhalinin Sosial Müdafiəsi Nazirliyindən bildirilib ki, həmin dövrdə əhaliyə sosial müavinətlər üzrə ötən ilin müvafiq dövrünə nisbətən 25 faiz çox olmaqla 662 mln. manat, Prezident təqaüdləri üzrə 21 faiz çox olmaqla 428 milyon manat ödənilib.

Yanvar-avqustda 90,8 min, sosial ödənişlərin elektron təyinatına başlandığı 2019-cu ildən 520 min müavinət və təqaüd təyinatı e-sistem üzərindən proaktiv qaydada həyata keçirilib.

 

Aytac Zeynalova