İran İsrailə növbəti dəfə xəbərdalıq edib

İsrail Qəzzaya zərbələri dayandırmasa, Yaxın Şərq nəzarətdən çıxacaq. Bunu İranın xarici işlər naziri Hüseyn Əmir-Abdollahian mətbuat konfransında İsrailə etdiyi xəbərdarlıqda deyib.
 
Nazir, İsrailə hərbi dəstək verməkdə ABŞ-nin də günahkar olduğunu bildirib.
 
"ABŞ və onun etibarlı nümayəndəsi İsrailə xəbərdarlıq edirəm ki, Qəzzada insanlığa qarşı cinayət və soyqırımı dərhal dayandırmasalar, hər an hər şey mümkündür və bölgə nəzarətdən çıxacaq. Nəticələrin isə həm regional, həm də müharibə tərəfdarı olanlar üçün ağır, acı və geniş təsirləri ola bilər. ABŞ-nin İsrailə hərbi dəstəyi Qəzzada davam edən münaqişənin "İsrail tərəfindən Birləşmiş Ştatlar adından həyata keçirilən vəkil müharibəsi" olduğuna sübutdur”, - o əlavə edib.
 
 
Oktyabrın 15-də ABŞ prezidenti Co Bayden İranı və Livanın şiə Hizbullah təşkilatını Fələstin-İsrail münaqişəsinə qarışmamaq barədə xəbərdarlıq edib. 
 
Oktyabrın 7-də HƏMAS İsrailə bir neçə min raket atıb və Əl-Əqsa Daşqını əməliyyatının başladığını elan edib.
 
Bunun fonunda İsrailin milli təhlükəsizlik naziri İtamar Ben-Qvir oktyabrın 7-də ölkədə fövqəladə vəziyyət elan edib.

İsrailin baş naziri Netanyahu ölkənin müharibə vəziyyətində olduğunu bəyan edib. İsrail ordusunun HƏMAS-a qarşı əməliyyatı "Dəmir qılınclar” adlandırıb.
 
İsrailin Qəzza zolağına hücumu nəticəsində ölənlərin sayı 5 mini keçib. Bu barədə Qəzza bölgəsinin Səhiyyə Nazirliyi məlumat yayıb.
 
 

 
 

www.anews.az