Doqquz ayda Aqrar Sığorta Fonduna müraciət edənlərin sayı açıqlanıb
2023-cü ilin doqquz ayında Aqrar Sığorta Fonduna ödənişlə bağlı 9 minə yaxın müraciət daxil olub. Bu barədə Aqrar Sığorta Fondundan bildirilib.
Həmçinin bildirilir ki, Fond bu il baş vermiş hadisələr və qeydə alınmış zərərlər üzrə fermer və təsərrüfatlara ödəniş etməyə başlayıb.
Ötən il Fond 2021-ci illə müqayisədə 2 dəfə çox - 2,4 milyon manat ödəniş edib.
2022-ci ildə Mərkəzi Aran Regionunda fermer və təsərrüfatlara 350 min manata yaxın sığorta ödənişi edilib.
Hazırda Fond 41 bitki növü üzrə əkinləri ümumilikdə 28 sayda riskdən qoruyur.
Sığorta haqqı birdəfəlik və ya hissələrlə ödənilə bilər. Dövlət büdcəsinin vəsaiti hesabına ödənilən hissə, yəni sığorta haqqının 50%-i, sığorta müqaviləsində başqa cür nəzərdə tutulmamışdırsa sığorta haqqı birdəfəlik ödənilir.
Nazirlər Kabinetinin 17 dekabr 2019-cu il tarixli 479 saylı və 22 dekabr 2021-ci il tarixli 398 saylı qərarlarına əsasən, Azərbaycanda aqrar sığorta hazırda 41 adda bitkiçilik məhsullarını əhatə edir. Bura buğda, arpa, qarğıdalı,kartof, şəkər çuğunduru, portağal, limon, naringi, çay, tütün, üzüm, fındıq, pambıq, günəbaxan, soya, yonca, noxud, noxud, alça, albalı, alma, armud, çiyələk, ərik, gavalı, gilas, heyva, xurma, nar, şaftalı, zeytun, badam, qoz, soğan, kələm, qarpız, yemiş (qovun), pomidor, sarımsaq, darı daxildir.
Aqrar Sığorta Fondunun çağrı mərkəzinin əlaqə nömrəsi 1651-dir.
Aytac Zeynalova
www.anews.az