BP yeni kəşfiyyat quyusunun nəticələrinin təhlilinə başlayıb
09.02.2024 18:11
BP-Azərbaycan şirkəti Xəzər dənizinin Azərbaycan sektorundakı "Şahdəniz" yatağında yeni "SDX-8" kəşfiyyat quyusu ilə bağlı nəticələrinin təhlilinə başlayıb, neft və qaz quyuları üzrə BP- Azərbaycan şirkətinin nvitse-prezidenti Cim O'Liri bildirib.
"SDX-8 kəşfiyyat quyusunda keçən ilin dekabrında 7 min metr dərinliyə uğurla çatdıq. Bu quyunun qazılması çox çətin idi, lakin biz layihə məqsədimizə səmərəli və təhlükəsiz şəkildə çatdıq. Quyu təhlili müddətinə konservasiya edilib”, - O’Liri cümə günü jurnalistlərə bildirib.
Onun sözlərinə görə, təhlil nəticələrinə əsasən şirkət gələcək planların nədən ibarət olacağına qərar verəcək.
"Dərinliyi 7 min metr olan bu tip mürəkkəb quyuların təhlili çox vaxt aparır. Bu müddət ərzində Heydər Əliyev adına qazma qurğusu "Şahdəniz” yatağında digər işlərə cəlb olunacaq”, - vitse-prezident qeyd edib.
Onun sözlərinə görə, şirkət 2024-cü ildə "Mərhələ-2” çərçivəsində "Şahdəniz” yatağında üç hasilat quyusu qazmağı planlaşdırır.
SDX-8 quyusu "Şahdəniz” yatağının əvvəllər işlənilməmiş hissəsində qazılıb.
"Şahdəniz” yatağının işlənməsi üzrə müqavilə 1996-cı il iyunun 4-də Bakıda imzalanıb və həmin il oktyabrın 17-də Milli Məclis tərəfindən ratifikasiya edilib.
Hazırda müqavilədə tərəflərin payı bp (operator - 29,99%), LUKOIL (19,99%), TPAO (19%), NICO (10%) və Cenub Qaz Dehlizi QSC (21 ,02%) təşkil edir.
Hazırda "Şahdəniz” yatağından qaz və kondensat hasilatı Mərhələ-1 çərçivəsində Alfa platformasından və Mərhələ-2 çərçivəsində Bravo platformasından həyata keçirilir. "Şahdəniz” yatağından qaz hasilatına 2006-cı ilin dekabrında başlanılıb.
N.Təbrizli
www.anews.az
Son xəbərlər 
Daha çox
Foto 
Video 
