Qazi əlillik ala bilmədiyi üçün intihara cəhd edib

29.02.2024 16:58

İkinci Qarabağ savaşında qazi olmuş Murad Bədəlzadə əlilliyinin təyin etdirə bilmədiyi üçün intihara cəhd edib. Bu barədə onun yaxını kimi təqdim edən Ceyran Həsənova sosial şəbəkə hesabında yazıb.

Məlumata görə, müharibə başlanan ilk gündən Murad könüllü olaraq cəbhəyə gedib. Füzuli və Xocavənd istiqamətində gedən döyüşlərdə iştirak edib.

"Murad piyada qoşunlarında atıcı olub. Müharibənin bitməyinə sayılı günlər qalmış Xocavənddə 631-ci yüksəklikdə yaralanıb, kəllə-beyin travması alıb. Muradın 25 yaşı var. O, 80 manat pensiya alır, ona əlillik statusu verilmir. Maraqlıdır ki, kəllə beyin travması alsa da, EEQ aparatı onun sağlam olduğunu "göstərir". Kiminsə ona maddi yardım etməsini istəmir, öz haqqını tələb edir", - paylaşmda qeyd olunub.

Məsələ ilə bağlı Murad Bədəlzadə ilə əlaqə saxladıq. O bildirdi ki, vəziyyəti hazırda sabitdir.

"Hazırda 1 saylı Şəhər Kliniki Xəstəxanasında mənə sistem köçürülür. Nazirlikdən üç dəfə imtina gəlib. Dözə bilmədim və intihar etdim. Bundan əvvəldə qollarımı kəsərək, intihara cəhd etmişəm. Mənə şəxsiyyət pozuntusu diaqnozu qoyulub. Lənkəran psixoloji mərkəzdə yatmışam. Başımdan yaralanmışam. Kağızım da var. F.7.1 , F.7.0, F.6.9, F.435, F.445 diaqnozları qoyulub. Amma Əmək və Əhalinin Sosial Müdafiəsi Nazirliyindən imtina cavabı gəlir",- qazi əlavə edib.

Dövlət Tibbi Sosial Ekspertiza və Reabilitasiya Agentliyinə İctimaiyyətlə əlaqələr şöbəsinin müdiri Tural Qurbanov anews.az-a bildirib ki, Murad Bədəlzadə 2024-cü ilin yanvarın 30-da Dövlət Tibbi-Sosial Ekspertiza və Reabilitasiya Agentliyinə dəvət edilərək əyani müayinə edilib.

"Səhiyyə Nazirliyinin və Agentliyin həkim-ekspertlərinin birgə müayinəsi zamanı vətəndaşın sağlamlıq vəziyyətində əlillik təyinatına əsas əlamətlər müşahidə edilməyib. Bu səbəbdən də Azərbaycan Respublikasının Nazirlər Kabinetinin 13 may 2022-ci il tarixli 187 nömrəli qərarı ilə təsdiq edilmiş "Əlilliyin müəyyən olunması meyarları”na uyğun olaraq Diaqnozun əlillik əlaməti təyin etməməsi barədə qərar qəbul edilib",- Tural Qurbanov əlavə edib.

Kliniki Tibbi Mərkəzin mətbuat katibi Ruzbeh Məhəmməd açıqlamasında bildirir ki, vətəndaş Bədəlzadə Murad Elşən oğlu psixatrik dərmanlardan zəhərlənərək Kliniki Tibbi Mərkəzin Toksikologiya şöbəsinə yerləşdirilib. Ona ilkin yardım olunub, palataya köçürülüb. Hazırda vəziyyəti stabildir.

Murad Bədəlzadə "Xocavəndin azad olunmasına görə" və "Cəsur döyüşçü" medalları ilə təltif edilib.

Aytac Zeynalova

www.anews.az

Xəbəri bəyəndiniz?

Sosial şəbəkələrdə paylaş