Azərbaycan bayrağı Strasburqda AŞPA-nın qərargahı qarşısında endirilib

Qazaxıstanda AZAL-a məxsus təyyarə qəzasında həlak olanların xatirəsinə ehtiram əlaməti olaraq, Fransanın Strasburq şəhərində Avropa Şurasının qərargahı qarşısında Azərbaycan bayrağı endirilib.  Bu barədə Avropa Şurası yanında Azərbaycanın daimi nümayəndəsi Fəxrəddin İsmayılov məlumat verib.

"25 dekabrda baş vermiş və çoxsaylı itkilərlə nəticələnən faciəvi təyyarə qəzası səbəbindən Azərbaycan xalqı matəm içindədir. Buna görə də Strasburqda Avropa Şurasının qərargahı qarşısında üçrəngli Azərbaycan bayrağı endirilib,” - o, X sosial şəbəkəsində yazıb.

Dekabrın 25-də Bakıdan Qroznıya uçan "Azerbaijan Airlines" aviaşirkətinə məxsus Embraer təyyarəsi Qazaxıstanın Aktau şəhəri yaxınlığında qəzaya uğrayıb. Təyyarədə 67 nəfər olub: onlardan 37-si Azərbaycan, 16-sı Rusiya, 6-sı Qazaxıstan və 3-ü Qırğızıstan vətəndaşı, həmçinin 5 ekipaj üzvü. Qəza nəticəsində 38 sərnişin həlak olub, aralarında üç uşaq olmaqla 29 nəfər sağ qalıb.

Azərbaycan Prezidenti İlham Əliyevin sərəncamına əsasən, 26 dekabr ölkədə bir günlük matəm elan edilib.

N.Tərizli