Tramp bəzi Meksika mallarına rüsumları aprelin 2-dək dayandırıb

ABŞ prezidenti Donald Tramp Meksikaya ABŞ-Kanada-Meksika Azad Ticarət Sazişinin (USMCA) əhatə etdiyi mallara aprelin 2-dək 
güzəşt verdiyini bildirib.

"Meksika prezidenti Klaudiya Şeynbaumla danışdıqdan sonra mən razılaşdım ki, Meksika USMCA-nın əhatə etdiyi heç bir şey üçün tarifləri ödəməli olmayacaq. Bu razılaşma aprelin 2-dək qüvvədədir", - Tramp Truth sosial şəbəkəsində yazıb.

"Mən bunu bir güzəşt olaraq və prezident Şeynbauma hörmət olaraq etdim. Münasibətlərimiz çox yaxşıdır və biz sərhəddə həm qeyri-qanuni mühacirlərin ABŞ-a daxil olmasını dayandırmaq, həm də fentanili dayandırmaq üçün çox çalışırıq", - Ağ Evin rəhbəri davam edib. 

“Prezident Şeynbauma zəhmətinizə və əməkdaşlığınıza görə təşəkkür edirəm”, o əlavə edib.

Martın 4-də ABŞ administrasiyası Kanada və Meksikadan demək olar ki, bütün idxallara 25% gömrük rüsumları tətbiq etdi, həmçinin Çindən gələn mallara tarifləri 10%-dən 20%-ə qaldırdı. Bloomberg-ə görə, hər il təxminən 1,5 trilyon dollar dəyərində idxal olunan mallara rüsumlar tətbiq edilir.
Gülnar