"Bakı Fond Birjası"nın dövriyyəsi 18 milyard manata yaxınlaşıb

2025-ci ilin birinci rübündə "Bakı Fond Birjası"nın (BFB) dövriyyəsi 17,84 milyard manat təşkil edib. Bu, ötən ilin eyni dövrünə nisbətən 2,4 dəfə çoxdur. Bu barədə  fonddan bildirilib.

Cari ildin yanvar-martında bağlanmış əqdlərin sayı 7 450-yə yüksəlib. Bu isə son bir ildə 2,4 dəfə artım deməkdir.

BFB-nin dövriyyəsinin 93,7 %-i və yaxud 16,7 milyard manatı repo əməliyyatlarının payına düşüb. Repo əməliyyatları bu dövrdə 3,4 dəfə artıb.

Hesabat dövründə, dövlət qiymətli kağızları üzrə əqdlərin dəyəri 9,6 dəfə azalaraq 228,1 milyon manat, korporativ qiymətli kağızlar bazarı üzrə əqdlərin dəyəri isə 92,3 % artaraq 900,63 milyon manat olub.

Azərbaycanda fəaliyyət göstərən əsas fond birjası olan "Bakı Fond Birjası" Qapalı səhmdar cəmiyyəti formasında yaradılmış kommersiya təşkilatıdır.
 
BFB 1997-ci ildə təsis edilib və yaradılmasında əsas məqsəd ölkədə mütəşəkkil fond bazarının formalaşdırılmasıdır. 

Azərbaycanda qiymətli kağızlarla mütəşəkkil ticarətin yeganə təşkilatçısı qismində çıxış edən  "Bakı Fond Birjası" QSC-nin yerli banklar, brokerlər və İstanbul Fond Birjası (Borsa Istanbul) da daxil olmaqla 20 səhmdarı mövcuddur. Birjanın fəaliyyəti Azərbaycan Respublikası Mərkəzi Bankı tərəfindən tənzimlənir. Birjada səhm və istiqraz kimi korporativ qiymətli kağızların, Maliyyə Nazirliyinin istiqrazları, Mərkəzi Bankın notları kimi dövlətin borc kağızlarının ticarəti və REPO əməliyyatları həyata keçirilir.

Aytac Zeynalova