Macarıstan Beynəlxalq Cinayət Məhkəməsindən çıxacaq

Macarıstan hökuməti Haaqa Beynəlxalq Cinayət Məhkəməsi ilə əməkdaşlığı dayandırmaq qərarına gəlib.Bu barədə Macarıstanın baş nazirinin aparatının rəhbəri Qergeli Qulyas məlumat yayıb.

“Hökumət Beynəlxalq Cinayət Məhkəməsindən çıxmaq barədə qərar qəbul edib. Konstitusiya və beynəlxalq hüquqi bazaya uyğun olaraq sazişə xitam verilməsi proseduru aprelin 3-də hökumət tərəfindən başlanacaq”, - Qulyas bildirib.

BCM-dən çıxma elanı HƏMAS hərəkatı ilə mübarizədə Macarıstanın dəstəyindən istifadə edən İsrailin Baş naziri Benyamin Netanyahunun Budapeştə səfəri ilə eyni vaxta təsadüf edir. Keçən ilin noyabrında Beynəlxalq Cinayət Məhkəməsi onun Fələstində hərbi cinayətlər və insanlığa qarşı cinayətlər ittihamı ilə həbsinə order verib.