Almaniya və Avstriyadan Serb Prezidentinə qadağa

Almaniya və Avstriya Serb Respublikasının Prezidenti Milorad Dodikə və iki serb siyasətçisinə ölkəyə girişini qadağan etmək qərarına gəliblər.Bu barədə Avstriya Xarici işlər naziri Beate Maynl-Rayzinger və Almaniyanın XİN-inin təmsilçisi Anna Lürman açıqlama veriblər.

Onların fikrincə, Bosniya və Herseqovinada "konstitusiya böhranına görə məsuliyyət daşıyanlara qarşı təcili olaraq əlavə tədbirlər görməyə" ehtiyac var. Bu səbəbdən, Dodik də daxil olmaqla, Serb Respublikasından olan üç siyasətçinin Avstriya və Almaniyaya girişinə qadağa qoyulub.

Diplomatlar iddia edirlər ki, Dodik “qanunun qırmızı xəttini keçib” və o, “Qərbi Balkan dövlətlərinin təhlükəsizliyini, sabitliyini, konstitusiya quruluşunu və bütövlüyünü təhdid edir”.

26 fevral 2025-ci ildə Bosniya və Herseqovina məhkəməsi Dodiki beynəlxalq ictimaiyyətin ölkədəki ali nümayəndəsi Kristian Şmidtin qərarlarını görməməzlikdən gəldiyinə görə bir il həbs cəzasına və altı il müddətinə siyasi fəaliyyətdən uzaqlaşdırılmağa məhkum edib.

Dodik məhkəmənin onun həbs edilməsi barədə qərarına baxmayaraq, ölkəni tərk etmək fikrində olmadığını bildirib.