Ticarət müharibələri böyük bir qasırğa yaradacaq - Ərdoğan

Ticarət müharibələrinin qlobal miqyasda nəticələri olacaq. Bunu Türkiyə prezidenti Rəcəb Tayyib Ərdoğan hakim Ədalət və İnkişaf Partiyasının fraksiyasının iclasında çıxışı zamanı deyib. 

"Tariflərdən qaynaqlanan ticarət müharibələrinin qlobal miqyasda nəticələri olacaq. Mübaliğəsiz demək olar ki, böyük və kiçik hər kəsə təsir edəcək böyük bir qasırğa gələcək", - prezident bildirib. 

Türkiyə lideri həmçinin bəyan edib ki, ölkəsi dünyada ən az itki ilə iqtisadi sarsıntılar yaşayır.

"İqtisadi problemləri həll edəcək və bizi şoklara qarşı dayanıqlı edəcək bir proqram həyata keçiririk. Dünyada böyük qeyri-müəyyənlik var, lakin Türkiyənin güclü iqtisadi proqramı var. Ticarət, istehsal və ixracatda mənfi vəziyyət gözləmirik. Biz aşağı tariflərə malik ölkə olduğumuz üçün bu dövrü daha asan keçəcəyik", - Ərdoğan bildirib.

Aprelin 2-də Tramp 185 ölkə üçün idxal tariflərinin yeni sistemini tətbiq edib. Baza dərəcəsi bütün idxal olunan mallar üzrə 10%, ayrı-ayrı ölkələr üçün isə xeyli yüksək olub - Çin üçün 34%, Vyetnam üçün 46% və Avropa İttifaqı üçün 20%. Buna cavab olaraq Çin də Amerika mallarına 34% rüsum tətbiq etdi. Dünya liderləri Trampın qərarını pisləyərək qisas alacağı ilə hədələyiblər.

Gülnar