Azərbaycan sığortaçıları xalis mənfəətini 2,7 % artırıb

Azərbaycanda fəaliyyət göstərən 16 sığorta şirkətinin 2024-cü ildə ümumi gəlirləri 1 milyard 362,32 milyon manat təşkil edib ki bu da  2023-cü illə müqayisədə 21,9 % çoxdur.

Eyni dövrdə şirkətlərin ümumi xərcləri 25,9 % artaraq 1 milyard 177,87 milyon manata çatıb. 11 şirkətin həm gəlirləri, həm də xərcləri artıb.

2024-cü ilin sonunda sığorta sektorunun ümumi maliyyə mənfəəti 184,46 milyon manat olub. Bu da əvvəlki illə müqayisədə 1,4 % çoxdur. 9 şirkət maliyyə mənfəətini artırıb, 6 şirkətdə isə azalma qeydə alınıb. 1 şirkətdə maliyyə zərəri azalıb.

Sığorta şirkətləri 2024-cü ildə ümumilikdə 32,75 milyon manat məbləğində mənfəət vergisi ödəyib ki, bu da 2023-cü illə müqayisədə 4,1 % azdır. 9 şirkət vergi ödənişini artırıb, 5-i azaldıb, 2 şirkət isə ardıcıl iki il vergi ödəməyib.

Hesabat ilində sığortaçılar ümumilikdə 151,7 milyon manat xalis mənfəət əldə edib ki, bu da 2023-cü illə müqayisədə 2,7 % çoxdur. Maliyyə mənfəətini artıran 9 şirkət xalis mənfəətini də artırıb, 6 şirkətdə isə hər iki göstərici azalıb. Maliyyə zərəri azalmış 1 şirkətin xalis zərəri də azalıb.