ABŞ xaricdəki səfirliklərinin kütləvi bağlamağı planlaşdırır

ABŞ Dövlət Departamenti xarici ölkələrdəki 30-a yaxın  diplomatik nümayəndəliyini bağlamağı planlaşdırır. Bu barədə The New York Times qəzeti məlumat verib. 

Nəşr qeyd edir ki, bu barədə daxili sənəd Dövlət Departamentində baxılır.

Martda bəzi ABŞ mediası artıq təxminən 10 konsulluğun bağlana biləcəyi barədə məlumat verib.  Lakin yeni məlumata görə, planlaşdırılan bağlanmalar daha genişmiqyaslıdır.

Bağlanması nəzərdə tutulan diplomatik nümayəndəliklərin əksəriyyəti Avropa və Afrika ölkələrində yerləşir. Siyahıda Malta, Lüksemburq, Lesoto, Konqo Respublikası, Mərkəzi Afrika Respublikası, Cənubi Sudan, Eritreya, Qambiya, Maldiv adaları və Qrenada kimi ölkələr var. Bu ölkələrdə ABŞ səfirlikləri tamamilə bağlana bilər.

Həmçinin Somalidəki səfirliyin və Bağdadda yerləşən diplomatik dəstək mərkəzinin ya tam bağlanması, ya da ciddi şəkildə ixtisar olunması tövsiyə olunur.

Azaldılması tövsiyə olunan konsulluqlar əsasən Avropada yerləşir: Fransada beşi (Bordo, Lion, Marsel, Renn, Strasburq), Almaniyada ikisi (Düsseldorf, Leypsiq), Bosniya və Herseqovinada ikisi (Mostar və Banya Luka). Bundan başqa, Yunanıstan, İtaliya, Portuqaliya, Böyük Britaniya, Kamerun, İndoneziya, Cənubi Afrika və Cənubi Koreyada yerləşən konsulluqların da bağlanması gündəmdədir.

Planlar həyata keçirilsə, ABŞ diplomatik nümayəndəliklərin sayı baxımından Avropa, Afrika və Şərqi Asiyada liderliyi Çinə uduzacaq.

The Washington Post daha əvvəl Tramp administrasiyasının Dövlət Departamentinə ayrılan büdcə vəsaitini yarıya endirmək niyyətində olduğunu, beynəlxalq təşkilatlara ayrılan maliyyənin isə təxminən 90% azaldılacağını yazmışdı. Bu çərçivədə BMT, NATO və digər 20 beynəlxalq təşkilata maliyyə dəstəyi dayandırılacaq, yalnız MAQATE və ICAO kimi bəzi qurumlar istisna təşkil edəcək.

N.Təbrizli