ABŞ-da faiz artımı Azərbaycana dolayı yolla təsir edə bilər - Mərkəzi Bank

ABŞ Federal Ehtiyat Sisteminin (FED) faiz dərəcələrini yüksək səviyyədə saxlaması və ya artırması qlobal bazarlara, dolayısı ilə Azərbaycana da müəyyən təsirlər göstərə bilər. Bu barədə Azərbaycan Mərkəzi Bankının sədri Taleh Kazımov mətbuat konfransında jurnalistlərin suallarını cavablandırarkən bildirib.

“Birbaşa ABŞ-Azərbaycan ticarət əlaqələri məhdud olduğu üçün birbaşa təsir gözlənilmir. Lakin ABŞ-ın faiz siyasəti Avropa və Asiya bazarlarında qiymət artımına səbəb ola bilər. Bu isə həmin bazarlarda təklifin dəyişməsinə və yeni ticarət marşrutlarının formalaşmasına gətirib çıxara bilər,” – Kazımov bildirib.

Mərkəzi Bank rəhbəri qeyd edib ki, bu kimi dəyişikliklər qlobal ticarət sistemində struktur dəyişiklikləri yarada bilər və bu da Azərbaycanda qiymətlərə dolayı yolla təsir edə bilər.

O, həmçinin bildirib ki, mövcud qeyri-müəyyənliklər və qlobal iqtisadi müzakirələr bu cür təsirlərin ölçülməsini çətinləşdirir.

«Son günlərdə baş verən kommunikasiya və müzakirələr göstərir ki, faiz dərəcələrinin yüksək səviyyədə qalma ehtimalı artır. Bu da qlobal iqtisadi stabillik üçün vacib amildir»,- o bildirib. 

Kazımov əlavə edib ki, bu təsirlərin Azərbaycanda qiymətlərə və ixrac dinamikasına necə əks olunacağını dəqiq demək üçün əlavə zaman və təhlil tələb olunur.

“Biz bu prosesləri izləyirik və müvafiq qiymətləndirmələr aparılır. Hər hansı yeni risklər yarandığı təqdirdə, Mərkəzi Bank öz siyasətini uyğunlaşdırmağa hazırdır,” – sədr vurğulayıb.

N.Təbrizli