Moskva–Təl-Əviv xəttində yeni istiləşmə? Ukrayna xəbərdarlıq edir

Rusiya Prezidenti Vladimir Putin və İsrailin Baş naziri Benyamin Netanyahu mayın 6-da son 18 ayda ilk dəfə telefon danışığı aparıblar. Hər iki ölkənin rəsmi qurumlarının verdiyi məlumata görə, söhbət dostyana atmosferdə keçib. Bu isə Ukrayna tərəfinin narahatlığına səbəb olub.

İsrailin Maariv qəzetinin məlumatına görə, liderlər İkinci Dünya Müharibəsində nasist Almaniyası üzərində qələbənin 80 illiyi münasibətilə qarşılıqlı təbriklərini bildiriblər. Netanyahu həmçinin Rusiya vətəndaşlığı da olan oğurlanmış israilli Səşa Tropanovun azad edilməsinə göstərdiyi dəstəyə görə Putinə təşəkkür edib.

Ukraynalı diplomatlar bu danışığı yalnız girovların azad olunması ilə bağlı texniki əlaqə deyil, Moskva ilə Yerusəlim arasında münasibətlərin istiləşməsinin əlaməti kimi qiymətləndiriblər.

Ukraynanın İsraildəki səfirliyinə yaxın mənbələrin bildirdiyinə görə, danışıqdan əvvəl israilli yüksək vəzifəli şəxslər Kiyevi qarşıdan gələn diplomatik dəyişikliklər barədə xəbərdar ediblər. Məlumata görə, onlar bu prosesin Ukrayna tərəfindən müsbət qarşılanmayacağını da etiraf ediblər.

N.Təbrizli