Trampdan Hollivuda qarşı ticarət müharibəsi – xaricdə çəkilən filmlərə 100% rüsum

ABŞ Prezidenti Donald Tramp ABŞ xaricində çəkilmiş bütün bədii filmlərə 100% gömrük rüsumu tətbiq ediləcəyini bəyan edib. O, bu qərarın Hollivudu “xilas etmək” üçün verildiyini bildirib.

“Amerika film sənayesi sürətlə çökür və biz onu qorumağa borcluyuq”,  - Tramp bildirib.

Tramp bəyan edib ki, xaricdə çəkilən filmlər “təkcə iqtisadi deyil, həm də milli təhlükəsizlik üçün təhdiddir”, çünki onlar “ideoloji təsir vasitəsidir”.

Yeni rüsum qərarı bir çox böyük layihələrə zərbə vuracaq. 2025-ci ildə ekranlara çıxması gözlənilən "Minecraft", “Ən mümkünsüz missiya 8” və “Yura dövrünün dirçəlişi” filmlərinin əsas çəkilişləri Böyük Britaniya, Kanada və İtaliyada aparılıb.

Ekspertlər xəbərdarlıq edirlər ki, bu addım ABŞ kino sənayesinə ciddi zərbə vura bilər.

Roth Capital Partners-in məlumatına görə, Netflix kontentinin 75%-dən çoxu xaricdə istehsal olunur.

Eyni zamanda Trampa yaxın olan aktyorların layihələri də risk altındadır — Mel Gibsonun yeni filmi İtaliyada çəkiləcək.

Wall Street Journal isə bu qərarın ABŞ iqtisadiyyatına və Hollivudun beynəlxalq mövqelərinə zərər verəcəyini bildirərək yazır ki,  “bu rüsumlar sənayeni çökdürə və qiymətləri artıra bilər”.

N.Təbrizli