Neftin ucuzlaşması Azərbaycanda kəsir riski yaradır - İNG

ING Group-un son iqtisadi icmalına görə, neftin ucuzlaşması Azərbaycanın 2020-ci ildən bəri ilk dəfə cari hesab balansında kəsirə səbəb ola bilər. Bu, ölkənin ixrac gəlirlərinin təxminən 88%-ni və büdcə gəlirlərinin 52%-ni neft ixracından əldə etməsi ilə bağlıdır.

Neftin orta illik qiymətində hər 1 dollarlıq azalma, Azərbaycanın ixrac gəlirlərində təxminən 300 milyon dollar və büdcə gəlirlərində 150 milyon dollar itkiyə səbəb olur.

2025-ci il üçün neft qiymətinin 5 dollar, 2026-cı il üçün isə 11 dollar azaldılması proqnozu, iki il ərzində ÜDM-in 2% azalmasına gətirib çıxara bilər.

Azərbaycanın əhəmiyyətli fiskal ehtiyatları olsa da, manatın ABŞ dollarına sabit məzənnəsi bu dəyişikliklərə uyğunlaşma imkanlarını məhdudlaşdırır.

Beynəlxalq ekspertlərin fikrincə, eyni zamanda, Özbəkistan qızılın qiymətinin artmasından faydalanır və 2025-ci ilin fevral-martında aylıq satışları 17 tona çatdırıb. Bu, qızıl ixracından illik gəlirin 7,5 milyard dollardan 10 milyard dollara qədər artmasına səbəb ola bilər.

ING həmçinin qeyd edir ki, MDB-nin 4 ölkəsinin (Azərbaycan, Ermənistan, Qazaxıstan, Özbəkistan) mərkəzi bankları artan inflyasiya riskləri səbəbindən faiz dərəcələrini dəyişməz saxlayır.

Azərbaycan üçün 2025-ci il üzrə ÜDM artım proqnozu birinci rübdəki zəif göstəricilər səbəbindən 0,5 faiz bəndi azaldılıb.

N.Təbrizli