Azərbaycan investisiya fondları hüquqi maneələrlə üzləşir

Azərbaycanda investisiya fondlarının inkişafını əngəlləyən hüquqi boşluqların aradan qaldırılması üçün qanunvericiliyə dəyişikliklər edilib və Milli Depozit Mərkəzinə yeni səlahiyyətlər verilib. Bu barədə Milli Depozit Mərkəzinin rəhnəri Müşfiq Məmmədli bildirib.

Onun sözlərimə görə, investisiya fondları kapital bazarının dərinləşməsi və vəsaitlərin effektiv yönəldilməsi baxımından mühüm alətdir. Lakin bu fondların fəaliyyətini tənzimləyən infrastrukturun tam formalaşmaması bazarın inkişafını ləngidib.

“Əsas problem ondan ibarətdir ki, qanunvericiliyə əsasən hər bir investisiya fondu aktivlərini saxlayan xüsusi depozitarla işləməlidir. Lakin indiyədək bu funksiyanı yerinə yetirən özəl depozitarlar formalaşmayıb,” – o bildirib.

Bununla əlaqədar olaraq, Mərkəzi Bank qanunvericiliyə dəyişiklik təşəbbüsü ilə çıxış edib və Milli Depozit Mərkəzinə xüsusi depozitar funksiyasını yerinə yetirmək səlahiyyəti verilib. Artıq Mərkəz müvafiq lisenziya almadan bu sahədə fəaliyyətə başlaya bilər.

Milli Depozit Mərkəzi nümayəndəsinin sözlərinə görə, ilkin əməliyyatlar üzrə texniki hazırlıq yekunlaşıb və yaxın aylarda qeydiyyat və əməliyyat mərhələsinə başlanacaq. Yeni sistem qiymətli kağızlarla yanaşı, alternativ aktivlərə – məsələn, daşınmaz əmlak və private equity – yatırımları da əhatə edəcək.

“Bizə daşınmaz əmlakın və qeyri-birja aktivlərinin qeydiyyatı sistemləri ilə informasiya mübadiləsi vacibdir. Bu məlumatların inteqrasiyası üzərində artıq işlər tamamlanmaq üzrədir,” – o qeyd edib.

N.Təbrizli