ABŞ-Azərbaycan münasibətlərinə nə mane olur? - səfir danışdı

Azərbaycan ABŞ tərəfindən 907-ci düzəlişin ləğv olunacağına ümid edir, çünki bu düzəliş ikitərəfli əlaqələrin inkişafına mane olur. Bu barədə Azərbaycanın ABŞ-dakı səfiri Xəzər İbrahim Diplomatic Watch nəşrinə müsahibəsində bildirib.

Onun sözlərinə görə, Azərbaycan əraziləri işğal altında olduğu və azərbaycanlılara qarşı etnik təmizləmələrin aparıldığı dövrdə qəbul edilmiş 907-ci düzəliş Konqresdə müəyyən lobbi qruplarının təzyiqi nəticəsində qəbul olunub.

“Bu, Azərbaycana qarşı ədalətsiz bir tədbir idi,” — diplomat vurğulayıb.

İbrahim ABŞ və Azərbaycan arasında güclü əlaqələrin davam etdiyini bildirib.

“Bizim strateji mövqeyimiz ABŞ ilə münasibətləri xüsusilə vacib edir. Azərbaycan ABŞ üçün əhəmiyyətli olan demək olar ki, bütün məsələlərdə rol oynayır. Eyni zamanda, ABŞ bizim üçün təkcə qlobal güc deyil, həm də ortaq maraq və dəyərlərə malik olduğumuz bir dövlətdir,” —  o əlavə edib.

Səfir vurğulayıb ki, Azərbaycan uzun illərdir ABŞ və İsraillə sıx əməkdaşlıq edir, bu da Cənubi Qafqazda və digər bölgələrdə təhlükəsizliyə töhfə verib.

Onun sözlərinə görə, Azərbaycan–İsrail–ABŞ əməkdaşlıq formatının inkişafı üç ölkənin maraqlarına cavab verir və Bakı bu əməkdaşlığın daha da dərinləşməsində maraqlıdır.

İbrahim nümunə kimi Avropa və Asiyanı birləşdirən Orta Dəhlizi göstərib.

 “Bu, ən qısa, sürətli və iqtisadi baxımdan səmərəli marşrutdur və həm İsrailə, həm Azərbaycana, həm də ABŞ-a fayda verəcək. Biz yalnız neft və qaz deyil, İsrail və qonşu ölkələr üçün vacib olan digər yükləri də daşıyırıq,” —  o bildirib və layihənin geniş regional kontekstdə nəzərdən keçirildiyini əlavə edib.

N.Təbrizli