Əliyev: Azərbaycan Avrasiya nəqliyyat əlaqələrinin əsas qovşaqlarından biridir

Azərbaycan Prezidenti İlham Əliyev Davos Ümumdünya İqtisadi Forumunun illik toplantısı çərçivəsində keçirilən “Avrasiyanın iqtisadi özünəməxsusluğunun müəyyənləşdirilməsi” mövzusunda paneldə çıxışı zamanı Azərbaycanın Avrasiya regionunda strateji rolunu vurğulayıb.

Dövlət başçısı Azərbaycanın nəqliyyat əlaqələrinin inkişafına mühüm töhfə verdiyini bildirib və Türkiyə ilə sıx müttəfiqlik münasibətlərinə diqqət çəkib.

Prezident İlham Əliyev qeyd edib ki, Azərbaycanın Türkiyəyə yatırımları 20 milyard ABŞ dollarını ötüb, ölkəmiz eyni zamanda Gürcüstanın ən böyük investorlarından biridir. Onun sözlərinə görə, ABŞ-nin kurasiya etdiyi TRIPP layihəsi və əlaqəlilik təşəbbüsü çərçivəsində Asiyadan Xəzər dənizi üzərindən Azərbaycan, Ermənistan, Azərbaycanın bir hissəsi olan Naxçıvan, Türkiyə və Gürcüstandan keçən yeni nəqliyyat dəhlizinin yaradılması planlaşdırılır.

Dövlət başçısı vurğulayıb ki, nəqliyyat marşrutlarının şaxələndirilməsi istehlakçılar, təchizatçılar və tranzit ölkələr üçün qarşılıqlı fayda yaradır.

“Biz dövlət olaraq regional gündəmimizə fokuslanırıq. Əgər regionda məqsədlərimizə nail ola bilmiriksə, qlobal ambisiyalardan danışmaq çətindir. Lakin bu gün Ermənistan–Azərbaycan və Türkiyə–Ermənistan yaxınlaşmasının paralel inkişafı fonunda geniş coğrafiyada dəyişikliklər baş verir. Bu proseslər Avrasiyada nəqliyyat əlaqələri, enerji təhlükəsizliyi, sülh və sabitlik baxımından həlledici əhəmiyyət daşıyır və uzunmüddətli münaqişələrin əməkdaşlığa çevrilə biləcəyini göstərir”, – Prezident İlham Əliyev bildirib.