Deputat biznes kreditlərinin iri şirkətlərdə cəmləşməsini tənqid edib

Deputat Qüdrət Həsənquliyev Azərbaycanda biznes kreditləri portfelinin 17,82 milyard manata çatmasına baxmayaraq, kredit artımının əsasən iri biznesin payına düşdüyünü bildirib və iqtisadi islahatların genişləndirilməsinə çağırıb.

“2026-cı ilin sentyabrına qədər biznes kreditləri portfeli 17,82 milyard manat olub. Ötən illə müqayisədə artım 8,1%-dir. İri biznesdə illik kredit artımı 23%, mikro biznesdə 19,7%, kiçik biznesdə 13,3%, orta biznes üçün 4,6% olub”, - deputat bildirib.

Onun sözlərinə görə, bu fərq bankların orta biznesə münasibətdə riskləri yüksək qiymətləndirməsi, kreditlərin qiymətinin gözlənilən mənfəətdən çox olması, şəffaf dövriyyənin olmaması və kreditlərin iri biznesdə cəmləşməsi ilə bağlıdır.

Həsənquliyev gələn il dövlət büdcəsi gəlirlərinin 33,2%-nin Dövlət Neft Fondundan transfert hesabına formalaşacağını xatırladaraq fondun gəlirliliyini Norveçin suveren fondu ilə müqayisə edib.

“Norveç pensiya fondunun aktivləri 2,29 trilyon dollar təşkil edir. Onun illik gəlirliyi 15,1%-dir. Bizim Neft Fondunda 74 milyard dollarımız var, illik gəlirliyi 6,2%-dir. Bu qədər fərqi nə ilə izah etmək olar? Axı az vəsaiti idarə etmək daha asandır. Hökumət üzvləri bu barədə də, hesab edirəm ki, düşünməlidir”, - o deyib.

Deputat iqtisadi islahatların genişləndirilməsinin, biznes fəaliyyətinə kənar müdaxilələrin qarşısının alınmasının, genişmiqyaslı özəlləşdirmənin aparılmasının, şəffaflığın artırılmasının və rəqabət mühitinin gücləndirilməsinin vacibliyini vurğulayıb.

“Vaxtın azlığını nəzərə alaraq hesab edirəm ki, qeyd etdiklərim yetərlidir ki, hər birimiz iqtisadi islahatların genişləndirilməsinin, biznes fəaliyyətinə kənar müdaxilələrin qarşısının alınmasının, böyük özəlləşdirməyə gedilməsinin, şəffaflığın artırılmasının, rəqabət mühitinin gücləndirilməsinin zəruriliyini qəbul etsin”, - Həsənquliyev bildirib.