TotalEnergies Azərbaycanda qaz emalı zavodu tikməyi planlaşdırır

Fransanın enerji şirkəti TotalEnergies Azərbaycanın Xəzər dənizində yerləşən “Abşeron” yatağında qaz emalı zavodu tikməyi planlaşdırır. Bu barədə şirkətin Avropada kəşfiyyat və hasilat üzrə baş vitse-prezidenti Jan-Lük Gizio Bakı Enerji Forumunda çıxışında bildirib.

“Layihə çərçivəsində ‘Abşeron’ yatağının inkişafının daha sonrakı mərhələsində sahil qaz emalı zavodunun tikintisi nəzərdə tutulur. Biz bu modeli daha əvvəl İraqda uğurla tətbiq etmişik və bu təcrübə Azərbaycanın da xeyrinə olacaq”, —  Gizio bildirib.

Onun sözlərinə görə, yeni zavod hasilatın karbon izinin azaldılmasına kömək edəcək. O əlavə edib ki, hazırlıq işləri artıq başlayıb.

“Abşeron” yatağında qaz və kondensat hasilatına 2023-cü ilin iyulunda start verilib. Yatağın qaz ehtiyatları 300–400 milyard kubmetr həcmində qiymətləndirilir.

N.Təbrizli