Rəsmi Bakı iki ölkə arasındakı atəşkəsi dəstəkləyir

Azərbaycan Xarici İşlər Nazirliyi İran və İsrail arasında atəş elan edilməsini dəstəkləyir. Bu barədə Xarici İşlər Nazirliyinin yaydığı bəyanatda deyilir. 

"İsrail və İran arasında atəşkəs elan edilməsini alqışlayırıq. Bu inkişaf regionda gərginliyin azaldılması və sabitliyin bərpası istiqamətində mühüm addımdır. Atəşkəsin əldə olunmasında vasitəçilik edən bütün tərəflərin səylərini yüksək qiymətləndirir və daha çox insan itkisinin və iztirabların qarşısını almaq üçün ona tam şəkildə əməl edilməsinə çağırırıq", -bəyanatda deyilir. 

XİN bəyanatında regionda təhlükəsizlik üçün möhkəm əməkdaşlığı dəstəklədiyini bir daha təsdiq edir. 

İyunun 24-ü səhər saatlarında ABŞ prezidenti Donald Tramp İsrail və İran arasında atəşkəsin qüvvəyə mindiyini elan edib . Ağ Ev rəhbəri tərəfləri onu pozmamağa çağırıb.

Daha sonra  İsrail Müdafiə Qüvvələri (IDF) İrandan onun ərazisinə raketlərin buraxıldığını açıqlayıb . İsrailin müdafiə naziri İsrael Katz İsrail ordusuna atəşkəsin pozulmasına qəti cavab verməyi əmr edib.

Gülnar Nazimqızı