Hakerlər Trampın müttəfiqlərindən oğurlanmış məktubları yaymaqla hədələyir

İrana bağlı hakerlər ABŞ prezidenti Donald Trampın yaxın çevrəsindəki şəxslərdən oğurlanmış elektron məktubları dərc etməklə hədələyiblər.

Reuters-in məlumatına görə, hakerlər Ağ Evin aparat rəhbəri Syuzan Uayls, Trampın vəkili Lindsi Halliqan, müşaviri Rocer Stoun və porno aktrisa Stormi Danielsin hesablarından ümumilikdə 100 qiqabayta yaxın məlumat əldə etdiklərini bildiriblər.

Hakerlər məktubların məzmununu açıqlamayıblar, lakin onların satışını istisna etməyiblər.

“Wall Street Journal” qəzeti may ayında Ağ Evin aparat rəhbəri Uaylsın şəxsi yazışmalarının sındırıldığını və onun adından Konqres üzvlərinə və şirkət rəhbərlərinə məktublar göndərildiyini yazmışdı.

Mənbələrə görə, iranlı hakerlər ötən il Trampın mümkün vitse-prezident namizədi Ceyms Devid Vensə dair məlumatları da Uaylsın hesabından əldə ediblər.

N.Təbrizli