Rusiya Azərbaycana İrandan vətəndaşlarının təxliyəsinə görə təşəkkür edib

Rusiya Fövqəladə Hallar naziri Aleksandr Kurenkov Azərbaycanın fövqəladə hallar naziri Kəmaləddin Heydərova İslam Respublikası ilə İsrail arasında gərginlik dövründə rus vətəndaşlarının İrandan təxliyəsinin təşkilinə görə minnətdarlığını bildirib. Bu barədə Rusiya Fövqəladə Hallar Nazirliyinin mətbuat xidməti RİA Novosti agentliyinə açıqlama verib.

Kurenkov iyulun 7-də Beynəlxalq Mülki Müdafiə Təşkilatının İcraiyyə Şurası və Baş Assambleyasının iclasında iştirak üçün Bakıya səfər edib və səfər çərçivəsində azərbaycanlı həmkarı ilə görüş keçirib.

“Azərbaycan tərəfi ilə birgə fəaliyyət nəticəsində mülki əhaliyə səmərəli yardım göstərildi,” – mətbuat xidmətinin açıqlamasında bildirilib.

İyunun 17-də Rusiya Prezidentinin mətbuat katibi Dmitri Peskov da Azərbaycan hökumətinə təşəkkür edərək, rusların İrandan təhlükəsiz şəkildə təxliyəsinin Bakı tərəfindən təmin olunduğunu qeyd etmişdi.

iranla İsrail arasında yaranan gərginlik zamanı 238 rusiyalı Azərbaycana təxliyə edilmişdi. 

Aytac