Sabah Əliyevlə Paşinyanın görüşü gözlənilir

Azərbaycan Respublikası ilə Ermənistan Respublikası arasında davam edən sülh prosesi çərçivəsində iyulun 10-da Birləşmiş Ərəb Əmirliklərinin Əbu-Dabi şəhərində Azərbaycan Prezidenti İlham Əliyevlə Ermənistanın Baş naziri Nikol Paşinyan arasında ikitərəfli görüş keçiriləcək.  Bu barədə AZƏRTAC məlumat yayıb. 

Paşinyan bu gün BƏƏ-yə işgüzar səfərə başlayıb. Ermənistan KİV-nin məlumatına görə, səfər çərçivəsində o, BƏƏ Prezidenti Şeyx Məhəmməd bin Zayed Əl Nəhyanla da görüşəcək.

Əliyev və Paşinyan sonuncu dəfə 16 mayda Tiranada keçirilən Avropa Siyasi Birliyi sammitində görüşmüşdülər.

ABŞ dövlət katibi Marko Rubio dünən verdiyi açıqlamada Ermənistan və Azərbaycan arasında yaxın vaxtlarda sülh sazişinin imzalanacağına ümid etdiyini bildirib.