Xankəndi bəyanatına etiraz əsassızdır -Bakıdan İran səfirinə cavab

Azərbaycan Xarici İşlər Nazirliyi İrannın Ermənistandakı səfiri Mehdi Sobhaninin Xankəndidə keçirilmiş İƏT Sammitinin yekun sənədi ilə bağlı dediklərini yolverilməz adlandırıb.

XİN-in sözçüsü Ayxan Hacızadənin sözlərinə görə, Xankəndi kommunikesi əvvəlcədən razılaşdırılmış qaydada, sədr xülasəsi formatında qəbul edilib və üzv dövlətlərlə əlavə razılaşdırmaya ehtiyac olmadan dərc olunub.

Hacızadə qeyd edib ki, İranın sənədə guya irad bildirməsi reallığı əks etdirmir və diplomatik praktikalara ziddir.

O bildirib ki, Xankəndi sənədində yer alan istinad — İslam Əməkdaşlıq Təşkilatının İstanbulda keçirilmiş 51-ci nazirlər sessiyasının yekununda qəbul olunmuş və azərbaycanlıların qayıdış hüququnu dəstəkləyən İstanbul Bəyanatına aiddir.

“Səfirin Armenpress-ə verdiyi açıqlamalar siyasi manipulyasiya və riyakarlıqdan başqa bir şey deyil,” –  Hacızadə vurğulayıb.

N.Təbrizli