İlham Əliyev monteneqrolu həmkarını təbrik edib

Azərbaycan Prezidenti İlham Əliyev Monteneqro Prezidenti Yakov Milatoviçi bu ölkənin milli bayramı münasibətilə təbrik edib.

Prezident Əliyev təbrik məktubunda Azərbaycan ilə Monteneqro arasında münasibətlərin konstruktiv və dostluq ruhunda inkişaf etdiyini vurğulayıb. O, iki ölkə arasında əməkdaşlığın xüsusilə iqtisadiyyat, turizm və sərmayə qoyuluşu sahələrində genişlənməsi üçün yaxşı imkanların mövcud olduğunu bildirib.

Əliyev həmçinin, Milatoviçin ötən ilin noyabrında COP29 tədbirində iştirak etmək üçün Bakıya səfərinin ikitərəfli əlaqələrin inkişafı baxımından önəmli olduğunu qeyd edib.

Dövlət başçısı Monteneqro xalqına sülh və rifah, Prezident Milatoviçə isə cansağlığı və fəaliyyətində uğurlar arzulayıb.