Eni Azərbaycan neftində çirklənmə aşkarlandığını bildirib

İtaliyanın enerji şirkəti Eni, daxili yoxlamalar zamanı emal zavodlarına daxil olan Azərbaycan mənşəli xam neftin bəzi partiyalarında xlororganik maddələr aşkarlandığını bildirib.

Şirkətin Bloomberg-ə verdiyi açıqlamaya görə, bu kimyəvi birləşmələr hasilat prosesində istifadə olunsa da, yüksək konsentrasiyada neft emalı avadanlıqlarına ciddi ziyan vura bilər.

Eni bildirib ki, artıq sistemə daxil olan xammal partiyaları ekoloji və texniki standartlara uyğun şəkildə, risk yaratmadan emal ediləcək.

BTC Blend markalı neftin əsas ixrac marşrutu olan Bakı–Tbilisi–Ceyhan (BTC) boru kəməri ilə gündəlik orta hesabla 575 min barel neft göndərilir. 

Bu infrastruktura BP-nin rəhbərlik etdiyi BTC Co. nəzarət edir.

Hazırda xlorid çirklənməsi fonunda Azərbaycan nefti son dörd ilin ən aşağı qiymətləri ilə satılır.

N.Təbrizli