Qızılın qiyməti yenidən 4600 dollara yaxınlaşıb

Dünya əmtəə bazarlarında qızılın qiyməti 4600 dollara yaxınlaşıb.

Dünya bazarlarında qiymətli və sənaye metalları üzrə qiymətlərdə artım müşahidə olunub.

Belə ki, Comex birjasında qızılın iyun fyuçerslərinin qiyməti 158,30 ABŞ dolları və ya 3,57% artaraq 4 592,40 dollar/unsiya olub. Spot bazarda isə qızılın qiyməti 83,17 dollar və ya 1,86% artaraq 4 558,68 dollar/unsiya təşkil edib.

Eyni zamanda, gümüşün may fyuçersləri (Comex) 3,97 dollar və ya 5,71% bahalaşaraq 73,54 dollar/unsiyaya yüksəlib. Misin may fyuçersləri isə 7,60 dollar və ya 1,39% artaraq 553,10 dollar səviyyəsinə çatıb.

Bundan başqa, spot bazarda platinin qiyməti 33,60 dollar və ya 1,74% artaraq 1 964,67 dollar/unsiya olub.

Analitiklər bildirirlər ki, qiymət artımı əsasən investorların riskli aktivlərdən çıxaraq daha etibarlı hesab olunan qiymətli metallara yönəlməsi, eləcə də qlobal geosiyasi gərginliyin davam etməsi ilə əlaqədardır.