Xarici dövlət borcunun 28%-i avrobondların payına düşür

2025-ci il iyulun 1-nə olan məlumata görə, Azərbaycanın xarici dövlət borcu portfelinin 27,7 faizini, yaxud 1,387 milyard ABŞ dollarını beynəlxalq maliyyə bazarlarında ticarət olunan xarici valyuta nominallı dövlət istiqrazları (avrobondlar) təşkil edir. Bu barədə Maliyyə Nazirliyinin hesabatında bildirilir.

Nazirliyin məlumatına görə, xarici borcun 41,9 faizi dövlət büdcəsi kəsirinin maliyyələşdirilməsi məqsədilə hökumət adından çıxış edən Maliyyə Nazirliyi tərəfindən cəlb edilib.

 Qalan 58,1 faiz isə müxtəlif icraçı qurumlar tərəfindən həyata keçirilən layihə və proqramlar çərçivəsində formalaşıb.

Xarici dövlət borcunun strukturuna gəlincə, borcun 61,6 faizi çoxtərəfli maliyyə institutları, 27,7 faizi avrobondlar, 10,7 faizi isə ikitərəfli maliyyə institutları ilə bağlanmış kreditlər üzrə öhdəliklərə aiddir.

Gülnar Nazimqızı