İran Zəngəzur dəhlizinin açılmasına mane olacaq

İranın ali rəhbərinin beynəlxalq məsələlər üzrə müşaviri Əli Əkbər Vilayəti bəyan edib ki, Tehran Zəngəzur dəhlizinin açılmasına qarşıdır və bu təşəbbüsə ya Rusiya ilə birgə, ya da təkbaşına mane olmağa çalışacaq.

“Azad İran” teleqram kanalının yaydığı məlumata görə, Vilayəti dəhlizin regional geosiyasi tarazlığı dəyişəcəyini və sərhədlərin yenidən çəkilməsinə səbəb ola biləcəyini deyib.

“Cənubi Qafqaz Trampın icarəyə götürə biləcəyi ərazidir? Qafqaz dünyanın ən həssas geosiyasi bölgələrindən biri sayılır və bu dəhliz Trampa məxsus tranzit marşrutu yox, onun muzdluları üçün qəbiristanlığa çevriləcək”, - deyə Vilayəti bildirib.

O qeyd edib ki, layihə bölgənin geosiyasi balansını dəyişəcək, sərhədlərin yenidən çəkilməsinə səbəb olacaq və Ermənistanın parçalanması planının bir hissəsi kimi nəzərdə tutulub. Trampın “başqa ölkədə dəhliz icarəyə götürmək” ideyasını “sadəlövhlük” adlandıran Vilayəti bunu Panama kanalının icarəyə götürülməsinə bənzədib.

Vilayətinin sözlərinə görə, layihə Ermənistan cəmiyyətində narazılıq yaradıb və Ermənistanın Baş naziri Nikol Paşinyan Tehrana səfəri zamanı bu narahatlıqları bölüşüb.

İran rəsmisi bildirib ki, dəhliz təşəbbüsü Cənubi Qafqazın təhlükəsizliyi üçün təhdid kimi qiymətləndirilir və İran öz milli və regional təhlükəsizlik maraqları çərçivəsində bu təşəbbüsə qarşı çıxacaq.

Vilayəti həmçinin qeyd edib ki, Rusiya da strateji baxımdan bu layihəyə qarşıdır.