ABŞ-Meksika sərhədində qanunsuz miqrantların sayı artıb - KİV

ABŞ Prezidenti Donald Trampın sərhəd təhlükəsizliyini gücləndirmək siyasətinə baxmayaraq, əvvəllər ölkədən deportasiya olunmuş miqrantların Meksika ilə sərhədi qanunsuz keçmək cəhdlərində əhəmiyyətli artım müşahidə olunub. Bu barədə "New York Post" nəşri məsələ ilə tanış mənbələrə istinadən məlumat yayıb.

Mənbələrin məlumatına görə, bu ay ABŞ sərhəd xidmətinin əməkdaşları 7 200-dən çox qanunsuz keçid halı qeydə alıblar. Bu göstərici iyul ayı ilə müqayisədə 57% artım deməkdir.

"New York Post" yazır ki, avqustun ortalarında Tramp Meksika ilə sərhəddə inşa edilən divarın qızmar günəş altında isinməsi və miqrantların onun üzərinə çıxmasının qarşısını almaq məqsədilə divarın qara rəngə boyanmasını əmr edib.

Sərhəd xidməti əməkdaşları nəşrə bildiriblər ki, son vaxtlar sərhədi keçməyə cəhd edənlər arasında aqressiv davranışlı və cinayətə meylli şəxslərin sayı artmaqdadır.