Prezident İlham Əliyev Tiencində Si Cinpinlə görüşüb

Azərbaycan Prezidenti İlham Əliyev bu gün Çinin Tiencin şəhərində Çin Xalq Respublikasının Sədri Si Cinpin ilə görüşüb.

Görüşdən əvvəl liderlər birgə foto çəkdiriblər.

Si Cinpin, Əliyevin "ŞƏT plyus" formatında keçirilən Zirvə toplantısında və Çin ordusunun faşizm üzərində qələbəsinin 80 illiyi ilə bağlı tədbirlərdə iştirakına görə təşəkkür edib. O, Azərbaycanla Çin arasında son 30 ildə qurulmuş əməkdaşlığın hazırda hərtərəfli strateji tərəfdaşlıq səviyyəsində davam etdiyini bildirib.

Çin lideri ikitərəfli ticarət dövriyyəsinin artdığını, energetika, bərpaolunan enerji və rəqəmsal texnologiyalar sahələrində əməkdaşlığın genişləndiyini qeyd edib. O, həmçinin “Bir kəmər, bir yol” təşəbbüsü çərçivəsində Azərbaycan ərazisindən keçən Transxəzər marşrutunun əhəmiyyətini vurğulayıb.

Si Cinpin, Pekinin Azərbaycanın Şanxay Əməkdaşlıq Təşkilatı ilə əlaqələrinin genişlənməsini dəstəklədiyini və ölkəsinin digər dövlətlərin daxili işlərinə qarışmamaq prinsipinə sadiq olduğunu bildirib. O, Ermənistan və Azərbaycan arasında davamlı sülhün əldə olunması üçün birbaşa dialoqun vacibliyini də vurğulayıb.

Prezident Əliyev Çin rəhbərliyinə dəvətə və tədbirlərə görə təşəkkürünü ifadə edib, Çin xalqını qələbənin 80 illiyi münasibətilə təbrik edib. O, Çinlə dövlət səfəri çərçivəsində keçirilmiş müzakirələrin iki ölkə arasında əlaqələrin inkişafına təkan verdiyini deyib və strateji tərəfdaşlığa dair imzalanmış sənədin əhəmiyyətini qeyd edib.

Azərbaycan lideri Tayvan, Honkonq və Sincan-Uyğur məsələlərində Pekinin mövqeyini dəstəklədiklərini, Tayvanda keçirilmiş seçkiləri pisləyən ilk ölkələrdən biri olduqlarını bildirib.

Əliyev ikitərəfli ticarət əlaqələrinin genişləndiyini, “Bir kəmər, bir yol” layihəsinin tərkib hissəsi olan Orta Dəhliz vasitəsilə yük daşımalarının artdığını və bu marşrutun səmərəliliyini vurğulayıb.

O, Azərbaycan və Ermənistan arasında ikitərəfli danışıqların davam etdiyini və sülhün artıq bərqərar olduğunu deyib.

Görüşdə beynəlxalq təşkilatlar çərçivəsində qarşılıqlı dəstək və vizasız gediş-gəliş rejimi nəticəsində turizm sahəsindəki artım da müzakirə olunub.

Tərəflər əməkdaşlığın gələcək perspektivlərinə dair fikir mübadiləsi aparıblar.