Ermənistan Çinin Tayvanla bağlı mövqeyini dəstəklədiyini bəyan edib

Ermənistan, Tayvanın Çin ərazisinin ayrılmaz hissəsi olduğunu və Tayvanın müstəqilliyinə qarşı olduğunu bildirib.Bu barədə Ermənistan və Çin arasında strateji tərəfdaşlıqla bağlı qəbul edilmiş birgə bəyanatda qeyd olunub.

“Ermənistan tərəfi dünyada yalnız bir Çin olduğunu qəbul edir və 'Vahid Çin' prinsipini dəstəkləyir. Tayvan Çin ərazisinin ayrılmaz hissəsidir və Çin Xalq Respublikası hökuməti bütün Çini təmsil edən yeganə qanuni hökumətdir,” – deyə bəyanatda vurğulanıb.

Ermənistan və Çin, sənaye, informasiya texnologiyaları, kənd təsərrüfatı, enerji və süni intellekt sahələrində əməkdaşlığı genişləndirmək məqsədilə qarşılıqlı investisiyaları artırmaq niyyətində olduqlarını bildiriblər.

Tərəflər, innovasiya və texnologiya sahəsində əməkdaşlığın gücləndirilməsinin vacibliyini qeyd edərək, birgə elmi-texnoloji parkların və tədqiqat mərkəzlərinin yaradılmasına dəstək verməyə hazır olduqlarını da bəyan ediblər.