TRIPP layihəsi Ermənistan və ABŞ arasında müzakirə mövzusudur -Paşinyan

Avqustun 8-də Vaşinqton bəyannaməsində qeyd olunan “Trump Route for International Peace and Prosperity” (TRIPP) layihəsi Ermənistan və ABŞ arasında ikitərəfli müzakirələrin mövzusudur. Bu barədə  Ermənistanın baş naziri Nikol Paşinyan bildirib.

Parlamentdə çıxış edən Paşinyan sənədin surətini təqdim edərək vurğulayıb ki, bəyannamə ABŞ prezidenti Donald Tramp, Azərbaycan prezidenti İlham Əliyev və onun özü tərəfindən imzalanıb və Ermənistanın suverenliyi ilə ərazi bütövlüyünü təsdiqləyir.

“Ermənistan ərazisindən keçəcək kommunikasiya barədə qərarları yalnız Ermənistan qəbul edə bilər,” —  o bildirib.

Paşinyan Əliyevin yenidən “Zəngəzur dəhlizi” ifadəsini işlətməsini qəbul etmədiyini deyib. 

“Ermənistan ərazisində bu adla infrastruktur ola bilməz. TRIPP Ermənistan–ABŞ gündəliyindədir. Azərbaycan öz layihələrini istədiyi adla adlandıra bilər, lakin bunun Ermənistanın suveren ərazisinə aidiyyəti yoxdur,” — o qeyd edib.

Avqustun 8-də da Vaşinqtonda keçirilən sammitdə Əliyev və Paşinyan Trampın vasitəçiliyi ilə yeddi maddəlik birgə bəyannamə imzalayıb və sülh sazişini paraflayıblar.

TRIPP layihəsi regional nəqliyyat əlaqələrinin bir hissəsi kimi təqdim olunub. Ermənistan və ABŞ əlavə olaraq “Sülhün Kəsişməsi” təşəbbüsü üzrə niyyət protokolu imzalayıb.

N.Təbrizli