Taha Ayhan: Halal Biznes Forumu regional təcrübələri bir araya gətirəcək

Bakıda keçirilən Halal Biznes Forumu müxtəlif regionlardan olan təcrübələrin paylaşılması və yeni iqtisadi əməkdaşlıqların qurulması üçün mühüm platformadır. Bunu Bakıda keçirilən Halal Biznes Forumunda çıxışı zamanı İslam Əməkdaşlıq Təşkilatı Gənclər Forumunun prezidenti Taha Ayhan bildirib.

“Bu forum ikitərəfli əlaqələrin qurulması və mövcud əməkdaşlığın genişlənməsi üçün əla imkandır. Burada formalaşacaq tərəfdaşlıqlar qlobal iqtisadi sistemə də müsbət təsir göstərəcək,” –  Ayhan qeyd edib.

Forum çərçivəsində Asiya, Yaxın Şərq, Avropa və Afrika ölkələrindən nümayəndələr halal məhsulların istehsalı, ticarəti və sertifikatlaşdırılması sahəsindəki uğurlu təcrübələrini təqdim edəcək. Təşkilatçılara görə, məqsəd üzv ölkələr arasında praktik bilik mübadiləsini təşviq etmək və ticarət-iqtisadi əlaqələri gücləndirməkdir.

Halal sənayesi son illərdə yalnız İslam dünyasında deyil, qeyri-müsəlman ölkələrdə də sürətlə inkişaf edir. Bu sahə qida məhsulları ilə yanaşı, maliyyə xidmətləri, turizm, kosmetika və tibbi məhsulları da əhatə edir. Ekspertlərə görə, halal iqtisadiyyat sürətlə qloballaşan yeni iqtisadi platformalardan biridir.

Gülnar Nazimqızı