KOBİA halal iqtisadiyyata töhfə verməyə hazırdır - Orxan Məmmədov

Halal iqtisadiyyatın inkişafı yalnız etik prinsiplərə deyil, həm də rəqabətli və şəffaf iqtisadi mühitin qurulmasına xidmət edir. Bunu Bakıda Halal Biznes Forumunda çıxışı zamanı Kiçik və Orta Biznesin İnkişafı Agentliyinin (KOBİA) rəhbəri Orxan Məmmədov bildirib. 

“Rəqabət şəraitinə dəstək göstərmək əsas hədəflərimizdəndir. Bu təşəbbüsə yanaşmamız praktik olmalı, real əməkdaşlıqlara əsaslanmalıdır,” –  Məmmədov Bakıda keçirilən Halal Biznes Forumu çərçivəsində vurğulayıb.

KOBİA rəhbəri qeyd edib ki, halal iqtisadiyyat sahəsində şəbəkələşmə və qarşılıqlı fəaliyyət imkanlarının yaradılması iştirakçı ölkələr və biznes strukturları üçün strateji əhəmiyyət daşıyır.

“Birlikdə işləməliyik. KOBİA olaraq bu prosesə daima töhfə verməyə hazırıq,” –  Məmmədov əlavə edib.

Halal Biznes Forumu 30-dan çox ölkənin nümayəndələrinin iştirakı ilə keçirilir. İki günlük tədbir sərgi, panel müzakirələr və ikitərəfli görüşlərdən ibarətdir. Forum çərçivəsində halal məhsulların sertifikatlaşdırılması, maliyyələşməsi və ticarəti üzrə əməkdaşlıq imkanları dəyərləndirilir.

Hazırda dünyada halal iqtisadiyyatın ümumi dəyəri təxminən 3 trilyon ABŞ dollarına çatır.

Gülnar Nazimqızı