Azərbaycan kibertəhlükəsizlik sahəsində maarifləndirmə və kadr hazırlığını sürətləndirib - Nazir müavini

Son illərdə rəqəmsallaşma prosesi ölkədə kibertəhlükəsizlik sahəsində maarifləndirmə və kadr hazırlığını sürətləndirib. Bunu Rəqəmsal İnkişaf və Nəqliyyat Nazirinin müavini Saməddin Əsədov Bakıda keçirilən “Critical Infrastructure Defence Challenge 2025” (CIDC-2025) tədbirində deyib.

Əsədovun sözlərinə görə, indiyədək 40-dan çox maarifləndirmə tədbiri keçirilib, 78 məktəbdə şagirdlər kibertəhlükələr barədə məlumatlandırılıb. 

Eyni zamanda, Elektron Təhlükəsizlik Xidməti (ETX) tərəfindən mübarizə mexanizmlərinin qurulması istiqamətində işlərə başlanılıb.

Nazir müavini qeyd edib ki, kadr potensialının artırılması məqsədilə İsrail universiteti ilə əməkdaşlıq çərçivəsində təlim proqramları xarici müəllimlərin iştirakı ilə həyata keçirilir.

 Onun sözlərinə görə, 300 mütəxəssis praktiki proseslərə, 500 nəfər isə təlimlərə cəlb olunub.

Azərbaycan rəqəmsal təhlükəsizlik strategiyası çərçivəsində maarifləndirmə, beynəlxalq əməkdaşlıq və texnoloji bacarıqların artırılmasına diqqəti gücləndirib.

 Elektron Təhlükəsizlik Xidməti (ETX) dövlət, təhsil və özəl sektor arasında koordinasiyalı fəaliyyətin qurulması ilə kibertəhlükəsizlik üzrə dayanıqlı sistemin formalaşdırılmasını hədəfləyir.

Azərbaycanda ikinci dəfə “Critical Infrastructure Defence Challenge 2025” (CIDC-2025) kiberfestivalı keçirilir. Konfransda daxili işlər naziri Vilayət Eyvazov və bir sıra rəsmilər iştirak edir.

Gülnar Nazimqızı