Azərbaycan və Braziliya gömrük əməkdaşlığını genişləndirmək üçün saziş imzalanıb

Noyabrın 13-də Braziliyanın Manaus şəhərində Azərbaycan Dövlət Gömrük Komitəsi ilə Braziliya Federal Gəlirlər Xidmətinin Gömrük Administrasiyası arasında “Gömrük işi sahəsində qarşılıqlı inzibati yardım haqqında Saziş” imzalanıb. Bu barədə Komitə məlumat yayıb.

Sazişi Azərbaycan DGK-nın sədri, gömrük xidməti general-leytenantı Şahin Bağırov və Braziliya Federal Gəlirlər Xidmətinin Gömrük Administrasiyasının rəhbəri Fabiano Koelho imzalayıblar.

Sənəd iki ölkə arasında gömrük sahəsində əməkdaşlığın genişləndirilməsini, ticarətin asanlaşdırılmasını, gömrük nəzarətinin səmərəliliyinin artırılmasını və beynəlxalq ticarət-təchizat zəncirinin təhlükəsizliyinin gücləndirilməsini hədəfləyir.

Saziş gömrük hüquqpozmalarının qarşısının alınması, araşdırılması üzrə qarşılıqlı inzibati yardım mexanizminin qurulmasını, məlumat və təcrübə mübadiləsinin aparılmasını, həmçinin texniki əməkdaşlığın və qabaqcıl idarəetmə-nəzarət üsullarının paylaşılmasını nəzərdə tutur.