Gecə tikinti işləri ilə bağlı sakinlərin şikayətləri artır - deputat

Deputat Naqif Həmzəyev böyük şəhərlərdə tikinti-quraşdırma işlərinin yaratdığı səs-küy və tozla bağlı şikayətlərin həlli üçün aidiyyəti qurumların birgə tədbir keçirməsini təklif edib.

“Bu məsələ uzun müddətdir - həm seçicilər, vətəndaşlar tərəfindən, həm də bir çox ekspertlər tərəfindən səsləndirilir. Ancak açıq deyim, konkret bu günə qədər real iş görülməyib”, - deputat bildirib.

Onun sözlərinə görə, Bakı, Gəncə, Sumqayıt və digər böyük şəhərlərdə bəzi tikinti şirkətləri səs-küylü işləri istirahət günlərində və gecə saatlarında aparır.

“Bu də nəticə etibarilə vətəndaşların, sakinlərin istirahət hüququnu pozur”, - deputat deyib. 

Həmzəyev tikinti materiallarının üzəri örtülmədən daşınması və iş sahələrinin düzgün hasarlanmaması səbəbindən ətrafa toz yayıldığını da deyib.

O, binaların xaricində quraşdırılan havalandırma və istilik sistemlərinin yaratdığı səs-küyün mövcud qaydalarda yetərincə nəzərə alınmadığını bildirib.

Deputat əsas problemlərdən birinin qurumlar arasında koordinasiyanın olmaması olduğunu vurğulayıb.

 “Hansı quruma bu şikayəti deyirsən, deyir ki, ‘bizim səlahiyyətlərimiz çərçivəsində deyil".

O, cərimələrin də tikinti şirkətləri üçün çəkindirici olmadığını söyləyib.

Gülnar Nazimqızı