Azərbaycanda altı şirkət və üç sahibkar haqsız rəqabətə görə cərimələnib

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi (AİBNA) aparılan araşdırmalar nəticəsində altı təsərrüfat subyektində və üç sahibkar tərəfindən haqsız rəqabət halları aşkar edib.

AİBNA-nın məlumatına görə, “Baku Electronics” MMC, “ABC Telecom” MMC (“Kontakt Home” əmtəə nişanı altında fəaliyyət göstərir) və “Trust Lux” MMC tərəfindən faktiki istehsal ölkələri Çin və Özbəkistan olmasına baxmayaraq məhsulların Yapon, Alman və Türkiyədə istehsal olunduğu təəssüratı yaradılıb. Bundan əlavə, fiziki şəxslər Quliyev Pərviz Məmmədhüseyn oğlu, Qurbanov Vüsal Nəriman oğlu və Vəliyev Dadaş Azadəli oğlu digər sahibkarların əmtəə nişanlarından və coğrafi göstəricilərdən qanunsuz istifadə etməklə haqsız rəqabətə yol veriblər.

Araşdırma nəticəsində aşkar olunan hallar Rəqabət Məcəlləsinin tələblərinin pozulması kimi qiymətləndirilib və həmin subyektlərə haqsız rəqabət hallarını aradan qaldırmaq və təkrar etməmək barədə icrası məcburi göstərişlər verilib.

Qurbanov Vüsal Nəriman oğlunun satdığı “AUXs” kondisionerlərində isə cinayət tərkibi əlamətləri olduğu üçün iş materialları Baş Prokurorluğa göndərilib.