ÜDM artımının zəif olması narahatlıq doğurur - Deputat

Bu ilin ilk 9 ayında ÜDM-in çox aşağı templə artması ciddi narahatlıq doğurur. Bunu Milli Məclisin deputatı Qüdrət Həsənquliyev parlamentdə çıxışı zamanı bildirib.

Onun sözlərinə görə, region ölkələri ilə müqayisədə Azərbaycan ən zəif artım göstəricisinə malikdir.

“Gündə 200 yeni iş yerinin açılması müsbətdir, amma gündə neçə nəfərin işini itirdiyi barədə məlumat verilmir. Bu da real mənzərəni görməyə mane olur", - o bildirib. 

Deputat həmçinin Bakının Xətai rayonunda yaşanan kommunal problemlərə toxunub. O, bir çox yaşayış massivlərində zirzəmilərin su ilə dolduğunu, binaların damlarının təmir olunmadığını, küçə itlərinin çoxaldığını, həyət işıqlarının işləmədiyini bildirərək, bu problemlərin uzun müddətdir həllini tapmadığını qeyd edib.

Qüdrət Həsənquliyev çıxışında hərbçilərin mənzil şəraitinin yaxşılaşdırılması üçün ayrılan 35 milyon manatın kifayət etmədiyini vurğulayıb.

“Bu vəsaitin bir neçə dəfə artırılmasına ciddi ehtiyac var. Hərbçilər ölkəyə xidmət edir və onların sosial təminatı yüksək səviyyədə olmalıdır",- deputat əlavə edib. 

Gülnar Nazimqızı