Ölkədə 28 otaqlı yeni sümük iliyi transplantasiyası mərkəzi istifadəyə verilib

Azərbaycanda 28 otaqlı yeni sümük iliyi transplantasiyası mərkəzi istifadəyə verilib. Bunu Yeni Klinikanın rəhbəri Barat Yusubov deyib.

“Klinikanın əsas strateji məqsədi ölkədə mövcud olmayan və ya məhdud şəkildə təqdim olunan tibbi xidmətləri yaratmaq və inkişaf etdirməkdir. Bu istiqamətdə təbibin ümumi strategiyasına uyğun olaraq bir sıra yeni xidmətlər artıq istifadəyə verilib. İndiyə qədər klinikada ürək-damar cərrahiyyəsi, invaziv radiologiya və robotik reabilitasiya kimi sahələrdə vacib layihələr uğurla həyata keçirilib. Bu xidmətlər mərkəzin uzunmüddətli inkişaf strategiyasının bir hissəsidir”,-o bildirib.

 Klinika rəhbəri əlavə edib ki, hazırda Azərbaycanda sümük iliyi transplantasiyası üzrə yalnız bir mərkəz fəaliyyət göstərirdi və orada cəmi 6 transplantasiya otağı mövcud idi. 

“Xəstələr bu otaqlarda 3–6 ay müddətində qalmalı olduğundan ölkənin ehtiyaclarını ödəmək mümkün olmurdu. Hər il 150–200 nəfərin sümük iliyi köçürülməsinə ehtiyacı yaranırdı və bu səbəbdən xəstələrin bir qismi dövlət, Heydər Əliyev Fondu və müxtəlif xeyriyyə təşkilatlarının dəstəyi ilə müalicə üçün xaricə göndərilirdi. Bu isə həm ağır maliyyə yükünə, həm də müalicə prosesində ciddi çətinliklərə səbəb olurdu. Bu problemləri aradan qaldırmaq məqsədi ilə Yeni Klinika genişmiqyaslı sümük iliyi transplantasiyası mərkəzi qurub. Artıq inzibati binanın 15-ci mərtəbəsi tam şəkildə bu işə ayrılıb və 1200 kvadratmetrlik sahədə 22 yeni transplantasiya otağı yaradılıb”,- o vurğulayıb.

Aytac Zeynalova